PILEULEUYAN
Assalamu’alaikum
warahmatullohi wabarokatuh
Nitih wanci nu mustari,
ninggang mangsa nu utama. Dina poé ieu urang patepung ngumpul ngariung di
tempat nu di papaés ku rupa-rupa kamonésan urang saréréa. Nu tujuanana iwal ti
acara pileuleuyan.
Dina waktu ieu pisan sim kuring saparakanca seja
ngahaturkeun mangrébu-rébu nuhun ka Ibu Kapala Sakola, Bapa miwah Ibu Guru nu
tos masihan mangrupa-rupa élmu pangaweruh salami genep warsih.
Sim kuring saparakanca pohara ngarasa bagjana, duméh dina
waktu ieu parantos tiasa namatkeun sakola nu dilakonan salami genep warsih.
Kabagjaan lianna, sim kuring saparakanca parantos dibekelan élmu pangaweruh nu
tiasa dianggé neruskeun sakola ka sakola nu leuwih luhur.
Sim kuring saparakanca ngagaduhan tékad yén élmu pangaweruh
nu ditampi ti Ibu miwah Bapa Guru di sakola salami genep warsih badé dianggé
bekel. Bekel pikeun neruskeun sakola, sarta bekel pikeun kahirupan di masarakat
engké.
Dina acara ieu pisan sim kuring nuhunkeun ka adi-adi anu
masih kénéh neruskeun nungtut élmu di ieu sakola, supaya
diajar sing enya-enya. Sabab diajar téh pohara pentingna pikeun nyanghareupan jaman nu beuki
maju. Lamun baé urang katinggaleun dina
diajar, tangtu bakal katinggaleun dina sagalana.
Nu panungtung ti simkuring ngedalkeun pileuleuyan ka
adi-adi kelas sadayana. Dungakeun sim kuring rék medal ka alam nu anyar.
Wassalamu’alaikum warahmatullohi wabarokatuh
0 komentar:
Posting Komentar